संत भेटीने गुरुपौर्णिमा उत्सव साजरा ; पालखी ठरले विशेष आकर्षण ;

एकूण दृश्ये: 138

संत भेटीने गुरुपौर्णिमा उत्सव साजरा ; पालखी ठरले विशेष आकर्षण ; तब्बल वीस हजार लोकांनी घेतला महाप्रसादाचा लाभ

संगमनेर { भारत रेघाटे }

प्रवरा म्हाळुंगी संगम तीरावर वसलेल्या श्री साईबाबा मंदिर, श्री स्वामी समर्थ मंदिर , श्री गजानन महाराज मंदिर तसेच परमपूज्य सीताराम बाबा गंगामाई घाट येथे मोठ्या भक्ती भावाने गुरुपौर्णिमा उत्सव साजरा करण्यात आला. श्री साईबाबा मंदिरात सकाळी 4 वाजता लघुरुद्राभिषेक करण्यात येऊन, पारायणकर्त्यांच्या हस्ते आरती करण्यात आली. सकाळी 7 वाजता संत भेट पालखी सोहळ्याच्या निमित्ताने भव्य दिव्य मिरवणूक काढण्यात आली.

मंदिर परिसरात आकर्षक रांगोळी आणि विद्युत सजावट करण्यात आली होती. मिरवणूक वाजत गाजत जात असताना फटाक्यांची अतषबाजी करण्यात आली. यावेळी साईबाबा मंदिर, महालक्ष्मी (कामाख्या) मंदिर, संतोषी माता मंदिर, या दोन्ही ठिकाणच्या देवींना साडी चोळी देण्यात आली. तसेच श्री गजानन महाराज, स्वामी समर्थ मंदिरात संत भेट घेण्यात आली. श्री साईबाबा यांनी हाताळलेला अती दुर्मिळ शेल्याचे पूजन करण्यात आले. सदर शेला लोकमान्य टिळक संगमनेर येथे आले असता खुद्द साईबाबांनी हाताळलेला होता हा शेला पालखीमध्ये भक्तांच्या दर्शनासाठी ठेवण्यात आला. मिरवणुकीमध्ये अबालवृद्ध युवा, महिला पुरूषांनी साईबाबा बोलो आदि गाण्याच्या ठेक्यावर ताल धरत साईबाबाच्या जयघोषाने परिसर दुमदुमून गेला.