शिवकालीन विचारधारा मराठी भाषेच्या अस्मितेचा दीपस्तंभ ; शिवबांनी स्वराज्य स्वभाषा, स्वसंस्कृतीला सर्वोच्च स्थान दिले

ह्या तर मराठी पाट्या नव्हेच !

इंग्रजी उच्चाराची देवनागरी कशासाठी ?

-:संपादकीय :-

मागील आठवड्यात मराठी भाषा गौरव दिन साजरा करण्यात आला. आणि आम्ही आणि इंग्रजाळलेले इंग्लिश भाषेचे धेडगुजरी उच्चार पावलोपावली क्षणोक्षणी उच्चारत मराठी दिन साजरा केला. हीच तिची शुद्धता असेल तर मराठी भाषेसाठी निश्चितच धोक्याची घंटा आहे.

शिवकालीन मराठी मूल्ये जपली पाहिजेत; मराठा तितुका मेळवावा, महाराष्ट्र धर्म वाढवावा आहे तितुके जतन करावे, पुढे आणिक मेळवावे. महाराष्ट्र राज्य करावे जिकडे तिकडे हे केवळ शब्द नाहीत, तर त्या शिवकालीन विचारधारेचा आणि मराठी अस्मितेचा दीपस्तंभ आहेत. छत्रपती शिवाजी महाराजांनी स्वराज्य उभारताना स्वभाषा, स्वसंस्कृती आणि स्वाभिमान यांना सर्वोच्च स्थान दिले.

मराठी ही केवळ संवादाची भाषा नसून ती आपल्या इतिहासाची, परंपरेची आणि ओळखीचा पवित्र वारसा आहे. छत्रपती शिवरायांना आपल्या मातृभाषेचा प्रचंड अभिमान होता. त्यांच्या कारभारात मराठीला प्रतिष्ठा मिळाली आणि प्रशासना पासून लोकजीवनापर्यंत मराठीचा सन्मानाने वापर झाला. त्यामुळे आजही आपण मराठी भाषेचे शुद्धत्व जपणे ही आपली जबाबदारी आहे.

आजच्या काळात देवनागरी लिपीत इंग्रजी शब्दांची धेडगुजरी मिसळून मराठीचे स्वरूप बिघडवले जात आहे. हा माझा स्पष्ट आरोप आहे. अशी दूषित होत चाललेली भाषा आपण का वापरावी ! हा साधा प्रश्न प्रत्येक मराठी भाषिकाने स्वतःला विचारण्याची गरज बनली आहे मराठी भाषा समृद्ध, सशक्त आणि अभिमानास्पद आहे; त्यामुळे तिच्या शुद्धतेचे जतन करणे हे आपल्या संस्कृतीचे रक्षण करण्यासारखेच आहे.