जेव्हा आमदार सत्यजीत तांबे पत्रकारांच्या भूमिकेत रिंग मास्टर होतात ! पत्रकारांची लेखनी कधीच बोथट होत नसते. औचित्यपूर्ण स्नेहसंवादात सुख दुःखांची देवाणघेवाण करत पेटली विचारांची शेकोटी अन् जागवला आत्मविश्वास

संगमनेर ( भारत रेघाटे )

पत्रकारितेची जाण असलेले एक धुरंदर राजकारणी, पत्रकारांच्या समस्या, कोटुंबिक परिस्थिती जाणून त्याची समरसतेने सांगड घालत, संवादकौशल्य साधत आमदार सत्यजीत तांबे यांनी पत्रकार दिनानिमित्त केलेला स्नेहसंवाद हा त्यांच्या लेखनीला आणि जीवनाला न्याय देणारी अनुभूती ठरली. हा संवाद भाषणाचा नव्हता, राजकारणाचा तर मुळीच नव्हता. तर तो होता मनामनांची सांगड घालणारा. पत्रकारांच्या वैयक्तिक आयुष्याला स्पर्श करणारा होता. रम्य अशा संध्याकाळी अमृतयोग साधत सहृदय विचारांची वाहिणी वाहत होती. प्रत्येकाच्या जीवनात चढ उताराची झालेली घालमेल शब्दबध्द करत त्यात अतूट दुवा निर्माण करून भावनांना मोकळी वाट करून देण्यासाठी सर्वच पत्रकार एकांतात आणि एकत्रित आमंत्रित करण्यात आले होते.. प्रत्येकजण आपापल्या अनुभवांच्या वर्तुळात उभा होता. पण त्या वर्तुळांना जोडणारा केंद्रबिंदू होता. त्या क्षणाचे साक्षिदार, भागिदार, पत्रकार, आमदार सत्यजीत तांबे रि़ग मास्टर होते. आपलेपणाची भावना. ती जवळीक, ती आत्मीयता क्षणिक नव्हती; ती प्रेरणा देणारी होती, विचार जागवणारी होती.

पत्रकारांचे भाव विश्व उलगडून घेण्याचा भावनिक नि प्रामाणिक प्रयत्न आमदार सत्यजीत तांबे, नगराध्यक्षा डॉ. मेथिली तांबे , माजी नगराध्यक्षा दुर्गा तांबे यांनी केला. पत्रकारितेच्या झगमगाटामागे दडलेली आव्हाने, संघर्ष, ताणतणाव यांची जाणीव ठेवत एक औचित्यपूर्ण स्नेहसंवाद घडवून आणला. सुख दुःखांची देवाण घेवाण झाली आणि पेटली एक नव्या विचारांची शेकोटी. ती राजकारणाची चर्चा नव्हती, तर प्रत्येक पत्रकारांच्या जीवनाची एक एक खरी बातमी समोर येत होती. बोचऱ्या थंडीतल्या त्या रम्य संध्याकाळी शब्दांना देणारी ऊब होती. डोलाने उभ्या राहिलेल्या आजूबाजूच्या भिती, झाडे, पानफुले ही जणू कान देऊन ऐकत होती. आमदार सत्यजीत तांबे जणू एका रिंग मास्टरप्रमाणे शब्दांची सूत्रे हातात घेत होते. पण हे सूत्र नियंत्रणाचे नव्हे, तर समन्वयाचे होते. पत्रकारांच्या वैयक्तिक, कौटुंबिक, आर्थिक आणि व्यावसायिक आयुष्याच्या चढ उतारांचा आलेख त्यांनी आपुलकीने समजून घेत पत्रकारांशी आपुलकीचा सेतू त्यांनी यावेळी उभारला.

नगरपालिकेच्या शंभर दिवसांच्या कामकाजाचा आढावा घेणारे सादरीकरण हे केवळ आकड्यांची मांडणी नसावी, तर लोकाभिमुख प्रशासनाची दिशा दाखवणारे असावे. हा विचार या संवादाच्या पायाशी होता. मुंबईसारख्या महानगरांतील तसेच परदेशातील उत्तम प्रशासन पद्धतींचा अभ्यास करून त्या स्थानिक स्वराज्य संस्थांमध्ये कशा उतरवता येतील, याचे दर्शन घडवणारा हा संकल्पच होता. याच पार्श्वभूमीवर पत्रकार दिनानिमित्त आमदार सत्यजीत तांबे यांनी घेतलेली भूमिका अधिक अर्थपूर्ण ठरली.