चोरट्यांचे पोलिसांनाच आव्हान ! दहा दिवसात दहा पट गुन्हे ; शहर आणि परिसर दहशतीखाली; अहर्निश चोरट्यांचा धुमाकूळ, 15 तासात तब्बल तेरा घरफोड्या ; काही आरोपी जात्यात, काही सुपात, काही तो-यात

संगमनेर ( प्रतिनिधी )

शहर परिसरात अहर्निश चोरट्यांचा चांगलाच धुमाकूळ वाढला आहे. चारी बाजुंनी शहराला घेरलय ! या धुमाकुळात पोलिसांची अक्षरशः धांदल उडत असून संगमनेर शहर आज कायद्याच्या छायेत नाही, तर कोयता गॅंग आणि चोरट्यांच्या दहशतीखाली जगत असल्याने चोरट्यांनीच आता पोलिसांना एकप्रकारे आव्हान दिले अशी काहीशी परिस्थिती संगमनेर शहर आणि परिसरात दिसून येत आहे.

दिवस कळेना, दुपार समजेना, रात्र तर वैराचीच, अक्षरशः अहोरात्र चोरट्यांनी शहराला चारही बाजूंनी वेढा घातला असेच चित्र सर्वत्र दिसत आहे. फक्त 15 तासात तब्बल 13 घरफोड्या लूट दहशत होऊनही चोरट्यांच्या मुसक्या आवळल्या जात नाहीत, ही बाब केवळ चिंताजनक नाही तर संतापजनक आहे.

कुठे रात्री घरफोडी, कुठे सकाळी, तर कधी सायंकाळी, चक्क सकाळी ११ वाजताही चोरट्यांनी उच्छाद मांडल्याची घटना समोर आली आहे. काही चोर दुचाकीवर, तर काही पायी सीसीटीव्हीतही त्यांच्या हालचाली कैद होऊनही चोर मात्र सैराट होवून फिरतात. अशीच अवस्था आज संगमनेरात दिसून येत आहे. एकीकडे चोरीचं सत्र वाढतंय, या नव्या वर्षात दहा दिवसात दहापट गुन्हाची नोंद झाली परंतु आरोपी, गुन्हेगार चोर, चितपट झालेच नाही.