आधार केंद्र चालकांवर उपासमारीची वेळ;

आधार केंद्र चालकांवर उपासमारीची वेळ; खासगी कंपनीकडे काम सोपवण्याचा सरकारचा घाट; हजारो युवकांचे भविष्य अंधारात!

{ 759 आधार संच एका झटक्यात बंद

मुंबई प्रतिनिधी

महाराष्ट्रातील महिला व बालकल्याण विभागातर्फे सुरू असलेल्या आधार नोंदणीच्या कामावर अलीकडच्या काळात गंभीर संकट ओढवले आहे. यापूर्वी महाआयटी या सरकारी कंपनीमार्फत राज्यभर हे काम सुरळीतपणे सुरू होते. विशेषतः ग्रामीण भागात हे कार्य अधिक परिणामकारकपणे सुरू होते. याच माध्यमातून गरोदर माता, बालके आणि इतर लाभार्थ्यांची आधार नोंदणी वेळेत व योग्य पद्धतीने होत होती. मात्र, अचानकपणे हे काम दुसऱ्या खासगी कंपनीकडे सोपवण्याचा निर्णय सरकारने घेतला असून, त्यामुळे अनेक आधार केंद्र चालकांवर उपासमारीची वेळ आली आहे.

759 आधार संच एका झटक्यात बंद; आदेश कुणाचा ?

या बदलामुळे राज्यभरात 759 आधार नोंदणी संच एका दिवसात बंद करण्यात आले. हा निर्णय नेमका कोणाच्या आदेशावरून घेण्यात आला ? याचा खुलासा अद्याप सरकारी पातळीवरून करण्यात आलेला नाही. हा निर्णय अचानक घेण्यात आला असून, त्याची कोणतीही पूर्वसूचना दिली गेली नाही. या निर्णयाचा सर्वाधिक फटका ग्रामीण भागातील नागरिकांना बसत आहे. अनेक ठिकाणी गरोदर माता, लहान बालके, वृद्ध व्यक्ती किंवा अन्य गरजू नागरिक आधार नोंदणीच्या प्रतिक्षेत आहेत. मात्र आधार केंद्रे बंद असल्यामुळे त्यांना सरकारी योजनांचा लाभ मिळवणे अशक्य झाले आहे.

गरिबांचे नुकसान, चालकांचे जीवन उद्ध्वस्त

गेल्या अनेक दिवसांपासून ग्रामीण भागात पोषण ट्रॅकरसह अनेक योजनांची अंमलबजावणी सुरू असताना, आधार नोंदणी संच अचानक बंद करण्यात आल्याने या योजनांची अंमलबजावणी ठप्प झाली आहे. याचा थेट परिणाम गरोदर महिलांवर, बालकांवर, वृद्धांवर होत असून, आवश्यक लाभ मिळवण्यासाठी आधार आवश्यक असल्याने अनेकांना त्रास सहन करावा लागत आहे. दुसरीकडे, हजारो आधार केंद्र चालक बेरोजगार झाले आहेत. अनेकांनी स्वतःच्या घरातील बचतीतून लाखो रुपये गुंतवून मशीन, बायोमेट्रिक उपकरणे, इंटरनेट कनेक्शन, ऑफिस इत्यादी तयार केले होते. आता त्यांचा हा व्यवसायच उद्ध्वस्त झाला आहे.