खंडोबा यात्रोत्सवात धार्मिक उत्सव, बैलगाड़ी शर्यतीसह मनोरंजनाची मेजवाणी

    संगमनेर 

पठार भागातील सावरगाव घुले येथे खंडोबा देवाच्या यात्रोत्सवा निमित्त तीन दिवस विविध धार्मिक कार्यक्रमा बरोबरच मनोरंजनात्मक कार्यक्रमांचे आयोजन करण्यात आले आहे. यात्रा उत्सवाचे मुख्य आकर्षण बैलगाडा शर्यत असून विज्येत्या स्पर्धकांचा मोठ्या रकमेचे बक्षीस देणार आहे. स्वयंभू श्री क्षेत्र खंडोबा देवस्थान यात्रा उत्सव शनिवार दि. १२ ते सोमवार दि. १४ एप्रिल दरम्यान पार पडणार आहे. शनिवार दि.१२ एप्रिल रोजी सकाळी ७ वाजता मल्हारी महात्मे पारायण आणि अभिषेक, सकाळी ८ वाजता मांडव डहाळे, सायंकाळी ६ वाजता मानाची काठी आणि पालखी मिरवणूक छबिना व शोभेचे दारू काम, रात्री ८ ते १० संध्या माने सह रोहन माने सोलापूरकर यांचा लोकनाट्य तमाशा, होणार असून रविवार दि. १३ एप्रिल रोजी सकाळी ८ वाजता देवस्थान महाआरती, सकाळी ९ ते ११ वाजता तमाशा हजेरी, सकाळी ११ ते सायंकाळी ५ वाजेपर्यंत बैलगाडा शर्यतीचे आयोजन करण्यात आले आहे. ५ वाजता आमदार डॉ. किरण लहामटे आणि आमदार अमोल खताळ यांच्या हस्ते स्पर्धेतील विजयी बैलगाडा मालकांना बक्षीस वितरणाचा कार्यक्रम होईल. रात्री ९ वाजता एलईडी स्क्रीनवर निर्माता दिगर्दशक निरंजन देशमुख यांचा "नवरदेव" हा बहुचर्चित चित्रपट दाखवण्यात येणार आहे. त्याचबरोबर यात्रोत्सवाच्या शेवटच्या दिवशी अर्थात सोमवार १४ एप्रिल रोजी ४ ते ६ वाजता कुस्त्यांचा हंगामा होणार आहे. तसेच सायंकाळी ६ ते ७ देव पालखी मिरवणूक छबिना व तळी भंडार असे विविध धार्मिक कार्यक्रम पार पडून या यात्रोत्सवाची सांगता होणार आहे. या यात्रा उत्सवाचा परिसरातील भाविक भक्तांनी लाभ घ्यावा असे आवाहन यात्रा कमिटीने केले आहे.